Tangis Yermia 5
Nun PANGERAN, sing emut ka nu karandapan ku abdi-abdi. Tingali kahinaan abdi sadaya.
Harta milik abdi-abdi dikawasaan ku jalmi-jalmi sanes, rorompok dicicingan ku jalmi-jalmi urang asing.
Para bapa parantos maraot ku musuh, indung-indung ayeuna jaradi randa.
Cai kangge nginum kedah dibayar, kayu kangge suluh kedah dipeser.
Abdi-abdi dipaksa digawekeun sapertos kalde atanapi onta, cape ge teu kenging ngaso.
Malar tedaeun cekap kangge hirup, abdi-abdi indit jajaluk ka Mesir sareng ka Asur.
Karuhun nu gaduh dosana, parantos maraot, abdi-abdi nu nandangan sangsarana.
Abdi-abdi diparentah ku jalmi-jalmi anu teu langkung ti harkat badega, nanging teu aya nu tiasa ngaleupaskeun abdi-abdi tina cangkinganana.
Di luar kota tingalider tukang-tukang maehan, upami abdi-abdi nyiar tedaeun, nyawa taruhanana.
Perbawa lapar, awak jadi nyongkab panas ku muriang, kulit ge panas sapertos anglo.
Bojo-bojo diperkosa di Gunung Sion pisan, di tiap desa di Yudea, mojang-mojang dipaksa masrahkeun kahormatanana.
Para pamingpin ditarangkepan, teras digarantung. Para sepuh teu diajenan.
Para jajaka dipaksa kedah ngagiling gandum saperti abid. Barudak leutik tingjarigjeug manggulan kayu anu bareurat.
Kolot-kolot tara deui dariuk di gapura kota, barudak ngora tara deui maen musik.
Kabagjaan abdi-abdi parantos musna tina kahirupan; igel abdi-abdi gentos jadi kanalangsaan.
Sugri nu jadi kareueus parantos teu araya. Abdi-abdi jadi cilaka ku margi parantos dosa.
Gering sajeroning pikir, panon meh teu awas ningal, kahalangan ku cipanon,
nalangsa ku Gunung Sion nu parongpong cunggelik sepi, ruruntuhanana jadi tempat laliarna anjing-anjing leuweung.
Nanging nun PANGERAN, Gusti teh Raja abadi, nu murba salalanggengna.
Ku naon ngantunkeun abdi sadaya sakitu lamina? Kumaha, kersa upami Gusti mikaemut deui ka abdi sadaya?
Wangsulkeun abdi sadaya, wangsulkeun ka pangkon Gusti, nun PANGERAN! Pulihkeun deui kamulyaan abdi-abdi sapertos kapungkur.
Atanapi bade tetep abdi-abdi dipiceun sapapaosna? Bade teras bendu teu aya watesna?